| Samira: | Hey, hoi Tommy, hoi DJ-Limmi, wie händers? Ich has mega lässig, ich han ä sturmfreii Bude! |
| Tommy: | Was heisst das: sturmfreii Bude? |
| DJ-Limmi: | Chunsch wideremal nöd drus. Das isch wänn niemer dihei isch, wo eim seit, was mer mache söll oder dörf! Elterä zum Bispil weisch. |
| Samira: | Niemer wo seit: Nei nei, kei Schoggi nä, oder ruum emal dis Zimmer uf und sottige quatsch. |
| Tommy: | Das heisst? |
| Alle: | Es mega Fäscht! |
| DJ-Limmi | Also uf was warted mer dänn no? Los, ab zu de Samira hei! |
| Tommy: | Wämmer dä Gotschalk au no mitnäh? |
| DJ-Limmi: | Oh ja, dä hät immer so cooli Ideä! |
| Alle: | Gotschalk chunsch au mit? |
| Gotschalk | Wohin? |
| Tommy: | Zu der Samira nach Hause. |
| Gotschalk: | Oh, gern. Treffen wir uns dort. |
| Tommy: | Isch das cool bi dä Samira dihei. Du wo isch jetzt eigentlich dä Gotschalk ane? Er isch doch grad no da gsi? |
| Gotschalk:(unsichtbar) | Schmatz, schmatz, schmatz... |
| DJ-Limmi: | He, losed emal. Ghöred er das au? |
| Samira: | Das tönt us de Chuchi. Ich gang emal go luege.....Ihr glaubets nöd, Dä Gotschalk hät de ganz Chüelschrank leergässe! Oje, wänn das s'Mami merkt! Jammer jammer... |
| DJ-Limmi: | Chömed, mer gönd id Stube uf em Sofa go umegumpä, das macht Spass. |
| Alle: | Oh ja, das isch cool! |
| Samira: | He DJ-Limmi, die Bluemevase muesch si lah, die isch mega tür gsi. |
| DJ-Limmi: | Klirrr! Oha, jetzt isch si mir abegheit! Häsch gse, wie die i tuusig Teili zersprunge isch, extrem. |
| Tommy: | Du mir isch scho ganz schlächt. I mir ine mäldet sich immer ä Stimm, wo eifach kei Ruhe git. Win en kaputte Radio oder so. Und diä seit immer "Mached das nöd, es isch nöd guet!" |
| DJ-Limmi: | He, ich gang hei, es isch sowieso nüme läss da! Tschüss Samira! |
| Tommy: | Tschüss Samira. |
| Samira: | Mega lustig. Was söll ich jetzt nur mache? |
| Sara: | Hallo Samira, was isch au los? |
| Samira: | Oh Sara, was söll ich bloss mache. Ich wott doch mini Fründe nöd verrate. Aber wänn mini Eltere erfahred, dass dä Gotschalk dä ganz Chüelschrank leer gässe hät und dä DJ-Limmi di tür Vase gschlisse hätt, dänn gits grosse Ärger für alli! |
| Sara: | Du Smira, du chöntsch ja d'Straf uf dich nä. Würsch das mache? Weisch, so wie Jesus. Er hät au eusi Schuld uf sich gnoh, obwohl er nüt Böses gmacht hät. So würdsch du bestraft, anstell vo dine Fründe. Aber musch eifach ehrlisch si und dine Eltere alle Säge. Überlegs dir. Tschüss Samira. |
| Tommy: | Hoi zäme. Du Samira, was händ dini Eltere gseit? |
| DJ-Limmi: | Also ich wotts gar nöd ghöre. Das git sicher ä dicki Straf! |
| Samira: | Ich han ihne alles gseit und dänn d'Verantwortig uf mich gno. Will ich mini Fründe sind und will ich eu gern han. Und so han nume ich d'Straf übercho. |
| Tommy: | Was häsch für e Straf übercho? |
| Samira: | Kei Schoggi meh, für ä ganzi Wuche! |
| Alle: | Oh oh oh |
| Tommy: | Du Samira, ich gib dir chli vo minere Schoggi. |
| DJ-Limmi: | Ich han au no en Osterhaas, er isch zwar scho chli abisse, aber du dörfsch en ha. |
| Samira: | Ihr sind dänn lieb. Fründe ha isch mega toll. |
| DJ-Limmi: | Hey, mir chönted doch go es paar Blüemli pflücke für de Samira ihri Eltere. Wie finde ihr das? |
| Alle: | Ja genau, das isch e super Idee. |