Uf Gott lose, mit ihm rede!

Ich He, hoi Karli Krähe, was machsch dänn Du für en Schnabel?
Karli Tuet mer leid, aber ich han e kein andere
Ich Du gäll, muesch nüd fräch werde, ich chan ja au nüd defür wenn'd nüd guet druf bisch.
Karli Ja, ja nüd defür, ich würd säge, wänn ich Dich nüd würd känne, würds mir einiges besser gah.
Ich So stopp emal. So öppis hät mer jetzt au no niemert gseit.
Karli Bisch Du sicher ja.
Ich Weisch was, verzell mer jetzt eifach emal, was mit Dir los isch.
Karli Nei, das chan i nöd
Ich Was heisst das, das chan i nöd?
Karli Ich chas nöd, ich will's nöd und damit paschta.
Ich Chumm verzells mir bitte, viellicht chan ich Dir ja hälfe
Karli Also guet, wills Du bisch, aber seisch es niemertem wiiter, gar niemertem
Ich Versproche
Karli Und die da une, was isch mit dene?
Ich Chumm Karli verzell jetzt.
Karli Also, Du häsch doch gseit, me cha mit Gott rede, wie wämmer mit öpperem telefoniert. So mit rede und lose. Also han ich s'Telefon gnoh han alles verzellt, was ich Gott han welle säge, scho lang emal welle säge und dänn han ich glosed und glosed und glosed und glosed...
Ich Ja und dänn
Karli He, ich bin nanig fertig unterbrich mich nöd und dänn hani glosed und glosed und glosed und glosed...
Ich Karli und dänn wie lang willsch no "und glosed" säge, öppe e Stund?
Karli Ja, Du häsch e Ahnig. Drü Stund bin ich a däm Telefon ghanget und han gar nüd ghört, nüd emal en Pips hät de Gott gseit, nüt, weisch wie chunnt mich das tüür!
Ich Aber Karli, ich han doch nüd richtig telefoniere gmeint.
Karli Aha, häsch falsch telefoniere gmeint. Wie macht me dänn das, falsch telefoniere?
Ich Nei, s'Telefon isch doch nur es Bispiel damit Du das besser chasch verstah.
Karli Ja, das heit mi au dunkt.
Ich Karli, wänn Du mit Gott redsch, dänn red er zu dim Herz, er seit dim Gwüsse, was guet und nüt guet isch, es isch wichtig, dass Du uf die Stimm losisch und das tuesch, won er Dir seit.
Karli A, so meinsch Du das, aha (wollen schon gehen, dann Karli) oh, oh, oh, ich glaub ich han grad die Stimm ghört.
Ich Gsesch scho funktionierts. Isch doch super, oder.
Karli Ja, ich weiss das nüd es so genau, ob mir das söll gfalle oder nöd.
Ich Ja, was hät Gott Dir dänn gseit?
Karli Also, er hät mir gseit, er hät mir also gseit ....
Ich So use mit de Sprach!
Karli Also er hät gseit, das ich mich bi Dir entschuldige sött, das ich so fräch gsi bin. Also Entschuldigung, sorry hä!